ELA sindikatuak jakinarazi duenez, Administrazioarekiko Auzien Gasteizko 3. Epaitegiaren epai batek ebatzi du Ertzaintzaren 27. promozioko hautaketa prozesua gainditu zuten bi emakume diskriminatu egin zituztela. Ebazpenaren arabera, Ertzaintzaren partetik «sexu joeragatiko zeharkako diskriminazioa» egon zen.
Epaitegiak derrigortu egin du Segurtasun Saila bi emakumeak «gaitzat» ematera, eta praktiketako agente izendatzera.
Bi hautagaiek arrakastaz gainditu zuten hautatzeko prozesu osoa, baina atzera bota zituzten soziograma deituriko proban.
Duela bi urte egin zuen salaketa ELAk. Arkautiko Akademiako zuzendariari adierazi zion «oso gertaera larriak» jazotzen ari zirela 27. promozioa gainditu zuten ikasleen prestakuntza prozesuan. «Zuzenean zein zeharka genero, sexu aniztasun, jatorri edo beste mota bateko bereizkeriak» gerta zitezkeela ohartarazi zion. Sindikatuak salatu duenez, akademiak ez zituen arazoak zuzendu. Eusko Jaurlaritzaren aurrean ere salaketa egin zuen sindikatuak. Adierazi duenez, hark ere ez zuen ezer egin. Azkenean, auzitara jo zuten bi hautagaiek, eta haiek arrazoia eman diete.
Sindikatuak eskatu dio Barne Sailari epaia berehala betetzeko, akademiako ebaluazio zerbitzuaren arduradunak kargutik berehala kentzeko, hautaketa prozesutik soziograma baztertzeko, eta han den prestakuntzaren inguruko eztabaida zabaltzeko.
Sindikatuak salatu duenez, soziograma deritzon probak hautagaien arteko bazterketa bultzatzen du. «Generoagatik, sexuagatik, jatorri politikoagatik eta abarrengatik» diskriminatzeko modua ematen duela adierazi du. Galdetegi bat da soziograma. Horretan, hautagaiek euren kideen inguruko galderak erantzun behar dituzte; esaterako, norekin aterako zinateke patruilatzera?, edo norekin ez zenuke arrisku egoera batean egon nahi? ELAren arabera, proba «ezkutuko anaia handia» da, eta, diskriminazioari bide emateaz gain, «korporatibismoa eta lankideen arteko mesfidantza saritzen» ditu.
LGTBIfobiaren aurkako eguna
Gay, lesbiana, transexual, bisexual eta intersexualekiko gorrotoaren aurkako eguna ospatzen da gaur munduan. Horren harira, ohar bat plazaratu du Eusko Jaurlaritzako Berdintasun, Justizia eta Gizarte Politiketako Saileko Berdindu zerbitzuak.
Horretan, «berdintasunerako eskubidearen eta sexu orientazio eta generoagatiko diskriminaziorik ezaren alde lan egiten» jarraituko dutela adierazi dute.
Salatu dutenez, koronabirusaren izurriak eragin duen egoerak «eragin handia» eduki du kolektiboan, desberdintasun arrakalak handitu dituelako. Gogoratu dutenez, Nazio Batuen Erakundean ordezkaritza duten estatuetatik 69tan oraindik zigortu egiten dituzte sexu bereko helduen artean adostutako sexu ekintzak.
«Gaur egun, oraindik ere beharrezkoa da gure gizartean oraindik indarrean dauden diskriminazioen aurkako borroka sendotzea. Gizarte osoaren erantzukizuna, diskriminazio eta indarkeria mota guztien aurka borrokatzeko. Euskadi inklusiboa eta askotarikoa aldarrikatzen dugu, aniztasuna aztergai dugun esparrutik ulertuta, baina baita bere osotasunean ere».
