Durangoko Udaleko Berdintasun Batzordeak eman du erasoen berri, eta horien "eta emakumeen aurkako edozein indarkeriaren" aurrean arbuioa adierazi du. Halaber, biktimei babesa adierazi die, udalaren "baliabide guztiak" eskaintzearekin batera. Udalak dei egin die herritarrei Andre Mari elizaren atarian ostegunero Plataforma Feministak antolatzen duen elkarretaratzera joan daitezen.
Eusko Jaurlaritzako Segurtasun Sailak, bere aldetik, eraso bakarraren berri eman du. Ukituak jasan dituela-eta, salaketa aurkeztu du emakumeetako batek ertzain-etxean.
Azken urteetan haziz joan da genero indarkeriari lotutako salaketen kopurua. Aurten, azarora bitartean, ia 4.000 ipini dira Hego Euskal Herrian. Asteburuan bertan, Gasteizen izandako sute bat ikertzen ari dira, indarkeria matxistarekin zerikusia duelakoan. Arabako hiriburuan bertan, iazko urtearekin alderatuta, %21 egin dute gora, hiriburuko alkate Gorka Urtaranek emandako datuen arabera.
