Bi gizon atxilotu dituzte Bizkaian bikotekideari eraso egitea egotzita

Eusko Jaurlaritzako Herrizaingo Sailak jakinarazi duenez bi gizon atxilotu dituzte gaur Bizkaian, ustez euren bikotekideei eraso egiteagatik.

Lehen atxiloketa Basaurin izan da. Antza denez, gauerdia jota bikotekide ohiarengana hurbildu zen erasotzailea. Ertzaintzak azaldu duenez, iraindu egin zuen eta ia lurrera bota arte jipoitu. Emakumeak salaketa jarri zuen eta etxera itzuli zenean ustezko erasotzailea etxeko atarian zegoen atea astintzen. Inguruan zebilen patruila batek atxilotu egin zuen 42 urteko gizonezkoa.

Bi ordu geroago, beste gizonezko bat atxilotu zuen Ertzaintzak. Etxebizitza batean egiten ari ziren jai batean, bikotekidea jotzea leporatzen diote. Ertzaintzako kideak erasoa gertatu zen lekura iritsi zirenean, anbulantzia batekin egin zuten topo. Erasotua izan zen emakumea artatzen ari ziren bertan; kolpeak zituen sudurrean eta masailean. Ertzaintzaren datuen arabera, erasotzaileak burutik heldu zuen emakumea eta hormaren aurka kolpatu zuen.