Igandean, goizaldeko ordu biak inguru zirela, Irunera bidean zihoazen frantziar nazionalitateko bi gizonak, eta Gaintxurizketan (Gipuzkoa) ertzaintzaren kontrola aurkitu zuten. Polizia ikusi bezain laster, autoak buelta eman zuen, eta abiadura bizian Donostiara jo zuten barruan zihoazen bi gizonek, ertzainak atzetik zituztela.
Ihesaldiak Donostiako Parte Zaharrean jarraitu zuen, eta beste auto bat ere sartu zen, bi gizonen eta poliziaren artean, azken horien bidea oztopatzeko asmoz. Azkenean, ihesari emana zion autoa Pasaiara bidean zihoala, errepidetik irten zen, eta bi gizonak atxilotu zituzten. Atxilotuei laguntzeko asmoz polizia oztopatu zuen autoa, berriz, Donostian aurkitu zuten, gidariak hantxe bertan behera utzita, eta oraindik ez dute aurkitu.
Atxilotuak hogeita bost urteko bi gazte dira, eta kilo bateko 74 zorro zeramatzaten, kalamuz beteta. Horrez gain, 30 kilo haxix ere aurkitu zituzten autoan. Lehendik ere, zenbait delituren aurrekariak zituzten gazteek: droga trafikoa, atentatua eta poliziaren aurkako erresistentzia.
