Ertzaintzak 53 eta 54 urteko bi gizon atxilotu ditu Donostian beste baten hilketarekin harremana dutelakoan. Bart gauean egin zituzten atxiloketak, ertzainak Antigua auzoko Mikeletes kaleko etxe bateko liskarrak ikertzera joan zirenean. Behin sartuta, gizon baten hilotza aurkitu zuten lurrean, ageriko lesio markekin.
Mediku zerbitzuak bertaratu zirenean ezin izan zuten ezer egin, eta gizona hilda zegoela baieztatu zuten. Hildakoak Poloniako herritartasuna zuen. Indarkeria zantzuak ikusita, ertzainek etxean zeuden beste bi gizonak atxilotu zituzten. Ertzaintzak ikerketa hasi du zer gertatu zen argitzen saiatzeko.
