Ertzaintzak jakinarazi duenez, bi gizonezko atxilotu dituzte Galdakaon (Bizkaia); adingabeei sexu erasoak egitea eta adingabeen intimitatearen aurkako delituak egitea leporatu dizkiete.
Dirudienez, gertakari horiek 2023ko otsailean hasi ziren. Ertzaintzak jakin duenez, gizonezkoek adin txikikoei sexu erasoak egiten zizkieten, eta opariak ematen zizkieten trukean. Batzuetan adingabeak behartu egiten zituzten bi gizonezkoek elkarrekin eta bi gizonezko horiek beste adingabe batzuekin izandako «sexu topaketak» ikustera. Gainera, zenbaitetan, grabatu ere egiten zituzten.
Bi atxilotu daude, 37 eta 21 urtekoak. Horietako bat joan den azaroan atxilotu zuten, eta epailearen aurretik igaro ostean, urruntze agindua jarri zioten; beste gizona, berriz, gaur atxilotu dute. Ikerketa oraindik zabalik dago, eta, azaldu dutenez, oraingoz sei adingabe izan dira erasoen biktima. Halere, Ertzaintzak uste du biktima gehiago egon daitezkeela, eta eskatu du salaketak jartzeko.
