Iruñeko Udaltzaingoak bi gizon atxilotu ditu asteburu honetan, eraso LGTBIfobo bat dela eta. Egotzi diete beste gizonezko bati kolpeka eta irainka eraso egin izana, homosexuala izateagatik. Iragan ostiralean gertatu zen erasoa, 23:30 aldera, Iruñeko hilerriko bidean.
Biktimak salaketan azaldu zuenez, bi erasotzaileak segika joan zitzaizkion, «hil daitezela marikoiak!» oihukatuz, eta hainbat kolpe eman zizkioten. Gazteak larrialdietara deitu zuen, eta Iruñeko Udaltzaingoak bi gizonezko atxilotu zituen handik gutxira, eraso homofoboaren egileak direlakoan: 28 urtekoa bata eta 29 urtekoa bestea. Biktima Nafarroako Ospitale Unibertsitarioan artatu zuten, aurpegian eta eskuetan zituen zauriengatik.