Ertzaintzak bi gizonezko atxilotu ditu azken orduetan, bata Bilbon eta bestea Zestoan (Gipuzkoa), ustez bikotekideak jotzeagatik. Eraso horiek behin baino gehiagotan jasan dituztela salatu dute ustezko bi biktimek.
Bilbon atzo arratsaldean izan zen atxiloketa, Bolueta auzoko etxebizitza batean, Eusko Jaurlaritzako Herrizaingo Sailetik gaur jakinarazi dutenez. Iturri beraren arabera, ertzainek frogatu zuten ustezko biktimak zauriak zituela, eta hark salatu zuen ez zela seme-alaben aurrean bikotekideak eraso egiten zion lehen aldia.
Zestoan atzo gauerdian 37 urteko gizonezko bat atxilotu zuten. Haren bikotekidearen arabera, "hainbatetan" eraso egin dio gizonak, seme-alaben aurrean.
