Ertzaintzak gizon bat atxilotu du Barakaldon (Bizkaia), ustez emaztea eta alaba jo dituelako, Eusko Jaurlaritzako Herrizaingo Sailak jakinarazi duenez. Gainera, erasoaren ondoren etxetik ihes egiten saiatu zirenean eskopeta batekin mehatxatu zituela gaineratu du. Lepoan emakumeak eraso zantzuak zitueta argitu du Ertzaintzak. Emakumeak salatu duenez aspalditik jasan dituzte gizonaren erasoak.
Gainera, Durangon gazte bat atxilotu du atzo neska-laguna jo zuelakoan. Arratsaldean izan omen zen erasoa, eta bizilagun batek ohartarazi zuen Ertzaintza. Tabira auzoan gazte bat lurrean zegoen neska bati ostikoak jotzen ari zela esan zuen. Biak adingabekoak dira. Genero indarkeria delitua leporatuta atxilotu dituzte Barakaldon eta Durangon atxilotutakoak.
