Ertzaintzak 27 eta 30 urteko bi gizonezko atxilotu ditu, Gipuzkoako hainbat herritako 40 etxebizitza baino gehiagotan lapurretak egin dituztelakoan. Eusko Jaurlaritzako Herrizaingo Sailaren arabera, gehienetan gauez egiten zituzten lapurretak, eta gailu elektronikoak, bitxiak, dirua eta kreditu txartelak lapurtzen zituzten.
Apirilean abiatu zuen ikerketa Ertzaintzak, eta asteazkenean Irunen susmagarria zen gizon bat poltsa handi batekin etxera sartzen ikusi ondoren, haren etxebizitzara sartu eta bi lagunak atxilotu zituzten bertan. Lapurtutako materiala ere atzeman zuen Ertzaintzak.
Ustezko lapurretak Irunen, Errenterian, Donostian, Hernanin, Villabonan, Zizurkilen, Urnietan, Tolosan eta Zarautzen izan dira. Gasteizen, Iruñean eta Santanderren (Espainia) ere egin dituzte lapurretak.
Aurkeztutako salaketa gehienen arabera, ustezko lapurrak sarraila behartu gabe sartzen ziren etxeetara, plastiko bat erabiliz.
