Uztailaren 6tik irailaren 3ra artean SARS-CoV-2 koronabirusak Araban, Bizkaian eta Gipuzkoan izan duen bilakaera aztertu dute Eusko Jaurlaritzako Osasun Sailak eta Osakidetzak txosten batean. Denera, 332.991 PCR proba egin dituzte bi hilabetean, eta 19.158 positibo atzeman dituzte. COVID-19 gaitza zuten 96 pertsona hil dira. Azaldu dute hildako horiei gaitza atzeman dietela azken bi hilabeteetan, baina horrek ez duela esan nahi zuzenean hark eraginda hil direnik.
Txosten horren arabera, intzidentzia tasak behera egin du azken astean hiru lurraldeetan, eta, kopuru gehientsuenetan, egungo egoera apalagoa da abuztuaren amaierakoa baino; duela hilabetekoaren antzekoa. Egunean ospitaleratutako pazienteen kopurua handia da oraindik, halere.
Zenbait herritan intzidentziak zer bilakaera izan duen jaso dute txostenean; besteak beste, Barakaldon, Gernikan eta Getxon. Irunen tasa igotzen ari da etengabe oraindik.
Eguneko datuak
Azken orduetan, 873 positibo atzeman dituzte Hego Euskal Herrian: 94 Araban, bezperan baino hogei gutxiago; 324 Bizkaian, 82 gutxiago; 188 Gipuzkoan, 35 gutxiago; eta 265 Nafarroan, 74 gehiago.
Gaitza duten 42 pertsona ospitaleratu zituzten atzo.
Nafarroako Gobernuak bihar jarriko du martxan koronabirusak kutsatutakoak atzemateko eta erregistratzeko aplikazioa.
Bizkaiko Foru Aldundiak atzo jakinarazi zuen Bizkaiko zahar etxeetan 24 egoiliar hil dituela gaitzak koronabirusaren bigarren olatua iritsi zenetik.
