Bi lagun atxilotu dituzte Asparrenan, altzairua lapurtzea egotzita

21 eta 24 urteko bi mutil gazte atxilotu zituen atzo Ertzaintzak Asparrenan (Araba), lantegi batetik altzairuzko piezak lapurtzea egotzita.

Jaurlaritzako Herrizaingo Sailaren arabera, atzo arratsaldeko seiak aldera gertatu zen lapurreta Asparrengo lantegi batean. Hain zuzen ere, enpresako langileek ustezko lapurrak ikusi zituzten lantegi barruan, eta ateak itxi zizkieten irtetea galarazteko. Halaber, Ertzaintzara deitu zuten. Ertzainak iritsi zirenean, altzairuzko ehun bat pieza aurkitu zituzten ustez bi lagun horiena zen furgoneta batean. Atxilotu egin zituzten lapurreta egotzita.

Hiru mila euro inguruko balioa zuten pieza horiek.