Bi lagun hil dira Gipuzkoako errepideetan, bi istriputan

Bi lagun hil dira ordu erdiko epean Gipuzkoan gertatu diren bi istripu larritan; gainera, bata bestetik kilometro gutxira izan dira.

Jaurlaritzako Herrizaingo Sailak agertu duenez, 14:05 aldera kamioi batek eta auto batek parez pare elkar jo dute N-1ean, Errenteriko saihesbidean, eta talkaren ondorioz autoko bidaiarietako bat hil da.

14:35 inguruan, berriz, motor batek istripua izan du A-8an, Donostiako Intxaurrondo auzoa eta Pasaia artean, eta gidaria hil egin da.

Ertzaintzak beraiekin harremanetan jartzeko eskatu die ezbehar bien lekukoei, gertatutakoa argitzen laguntzeko.

Bi istripuek auto ilarak eragin dituzte.