Ezbeharraren ondorioz, bi gorpuak kiskalita geratu ziren, eta hainbat ordu behar izan dituzte nortzuk ziren jakiteko. Oses enpresaria zen, eta De la Vega Arroizko medikua. Piztu zen sutea inguruetan zabaldu zen, eta, foruzainez gain, Azkoiengo suhiltzaileak ere aritu ziren lanean, sua itzaltzen.
Eguerdiaren ondoren gertatu zen ultra-arinaren istripua. Goizeko hamaikak pasatuta aireratu ziren biak Sesman, eta hainbat lekukok esan dute 12:20 inguruan kea ikusi zutela, Milagron. Ezbeharra gertatu zen lekua Milagrotik gertu dagoen amildegi bat da.
Bi hildakoak oso ezagunak ziren, biak ere zinegotzi ohiak baitziren. De la Vega Arroitzeko PSNko zinegotzi izan zen 2003tik 2011ra. Oses, berriz, Andosillako zinegotzi izan zen CDNrekin 1999 eta 2007 bitartean. Manuel Teres Andosillako alkateak esan du Osesek urteak zeramatzala zaletasun horrekin eta esperientzia handia zuela.
