Bi palestinar hil eta beste 11 zauritu dituzte azken orduetan Nabulusen eta Ramallahean. Maan albiste agentziak zabaldu duenez, gazteetako bat, 36 urteko Ahmad Said Suod Khalid, Nabulusko meskitara zihoan otoitzera, soldaduek geldiarazi eta etxera itzultzeko agindu ziotenean. Hark, ordea, entzugor egin zien, eta, lekukoen arabera, soldaduek tiro egin zioten.
Israelgo armadak esan du, ordea, Khalidek "aurre egin" ziela militarrei eta "tiro egin behar izan" ziotela.
Hildako beste gaztearen gorpua, Mahmoud Ismail Atallahrena, Ramallaheko etxebizitza bateko teilatuan aurkitu dute, Israelgo armadaren frankotiratzaileak zeuden eraikin batetik gertu. Lekukoek azaldu dutenez, tiroz hil dute.
Joan den astetik operazio militarrak egiten ari da Israelgo armada Zisjordanian, joan den astean desagertutako hiru gazte bilatzeko aitzakian. Operazioa hasiz geroztik bost gazte palestinar hil dituzte, eta 370 inguru atxilotu.
