EH Bilduren irudiko, Gipuzkoako Foru Gobernuak ez du argitu nahi Bidegi auzia, eta 30 milioi euro nora joan ziren argitzerik ez du nahi. Epaileak auziarekin aurrera jarraitzea erabaki duenez delitu zantzuak badaudela gogora ekarri du koalizioak, eta "onartezina" iruditu zaio kargu publikoan egonda, EAJk "jarrera ilun eta oztopatzailea" izatea. Horregatik, Iban Asensio EH Bilduko batzarkideak "gardentasuna" eskatu dio Markel Olanoren gobernuari.
Foru gobernuaren jarrerak ez du harritu EH Bildu: "Espero genuen aurreko txosten teknikoak gezurtatzeko dokumentazioa aurkeztea". Baina, espero arren larria iruditzen zaio. Hala, "herritarren diruaz eginiko ustezko ustelkeria kasua" dela azpimarratu du Bilduk, eta ikerketa batzordea "inoiz baino beharrezkoagoa" dela ohartarazi du.
