Atzotik begirada guztiak zituen gainean Espainiako Bioetika Batzordeak: AstraZenecarekin txertatutako 60 urteko herritarrek bigarren dosia ere etxe horretakoa hartzeko aukera eman zuten gobernuak eta erkidego arteko batzordeak, eta Bioetika Batzordearen onespenaren zain zeuden. Batzordeak gaur eman du epaia, eta loteslea ez bada ere, gobernuaren erabakiaren alde egin du. Hori horrela, Espainiako Gobernuak bigarren dosia Pfizerren txertoarena izatea hobetsi badu ere, herritarrek AstraZenecaren bigarren dosia hartzeko aukera izango dute, inprimaki bat sinatzen badute.
Espainiako Gobernuak iragarritako neurria Karlos III.a Unibertsitateak egindako ikerketa batean oinarritu dute. Izan ere, AstraZenecaren lehen dosia hartu zuten 60 urtetik beherakoen bigarren dosiari begira jarri ziren, EMA Sendagaien Europako Agentziak AstraZenecaren txertoak zenbait txertatuk jasandako odolbilduekin harremana zuela baieztatu eta gero. 600 boluntario inguru txertatu dituzte Pfizerren dosiekin, erantzun immunologikoa aztertzeko. Hain zuzen ere, gobernuaren erabakia lau astez atzeratzea ekarri zuen ikerketak, oraindik emaitzak jaso gabe baitzeuden. Emaitzek bi txertoak uztartzea eraginkorra zela baieztatu eta gero ezarri du neurria Espainiako Gobernuak. Espainiako Gobernuaren erabakia EMAk emandako irizpideen aurka doa, Europako agentziak espresuki adierazi baitu AstraZenecaren txertoen pauta bukatzea dela egokiena. Gobernuaren erabakiari baiezkoa eman dio, ordea, Bioetika Batzordeak.
Hain zuzen ere, batzorde hori izango da AstraZenecarekin txertatzea nahi dutenek bete behar duten inprimakia sortzearen arduraduna. Hori hartu nahi dutenek sinatu egin beharko dute AstraZenecaren txertoak eragin dituen odolbilduen kasuak ezagutzen dituztela.
