"Ekainaren bukaeran". Nafarroako Hezkuntza kontseilari Maria Solanak iragarri du lau hilabete barru eginen dituztela Bigarren Hezkuntzako eta Lanbide Heziketako lan eskaintza publikoari dagozkion hautaprobak, "gutxi gorabehera".
Solanak argitu duenez, Nafarroako Gobernuak ez du oraindik deialdi ofiziala egin, Espainiako Hezkuntza Ministerioaren zain baitago. Hezkuntzako funtzio publikorako sarbidea arautzen duen errege dekretuaren moldaketa onartu behar du Madrilek oraindik, eta hori gertatu arte itxarongo du Nafarroako Hezkuntza Departamentuak.
211 lanpostu aterako dituzte lehiaketa publikora: horietatik, 191 postu dagozkio 2017ko lan eskaintza publikoari; eta horiei batu behar zaizkie 2015eko deialdian eman gabe gelditu ziren 20 plaza. "Ahalik eta postu gehien eskaintzeko konpromiso osoa dugu", azaldu du kontseilariak parlamentuan, UPNk eginiko galdera bati erantzunez.
