Prokuradoreak baieztatu duenez, astearte arratsaldean zendu zen Natalie Van Put, baina fiskaltzari ez zioten atzo arte abisatu. Gorpuari autopsia eginen diote gaur arratsaldean Bordelen, 15:00etan, heriotzaren zergati zehatzak aztertzeko. Ipar Euskal Herriko Bortizkeriaren Aurkako Kolektibo Feministak, EHZko Brigada Ubelak, Emazteek Diote-k eta PAFek elkarretaratzera deitu dute biharko: Bidarten eginen dute,18:00etan, Donibane Lohizunera doan bideko suan.
Ez zen Bidarten urkaturik atzemandako gizonak emaztea jotzen zuen lehenbiziko aldia. Vuelta Simon Baionako prokuradoreak BERRIAri azaldu dionez, hain zuzen, astelehenean ustez emaztea hiltzen saiatu eta ondotik bere buruaz bertze egin zuen gizonezkoak aurrekariak zituen indarkeria matxistagatik.
2014ko azaroan kondenatu zuen gizonezkoa Baionako Auzitegi Korrekzionalak, urte bereko maiatzean emaztea jotzeagatik. Lau hilabeteko espetxe zigorra ezarri zion epaileak, baina gibelapenarekin. Aitzinetik bertze deliturik egina ez zuenez, beraz, ez zuen espetxera joan beharrik izan. Haren aurkako neurri berezirik ez zuen eman epaitegiak, halaber. Erraterako, ez zuen urruntze agindurik, eta senar-emazteak elkarrekin bizi ziren Bidarten (Lapurdi), 9 urteko haur batekin batera.
Vuelta Simonek azaldu duenez, neurriak hartzea «ez da nahitaezkoa» horrelako kasuetan: «Ez da sistematikoa; kasuaren araberakoa da». Gaineratu du emazteak ez zuela salaketa judizialik ezarri gizonezkoaren kontra.
Aurten indarkeria matxistaren ondorioz hiltzen den aurreneko emakumea da Baionako ospitalean hildakoa. Urtarrilean 17 hilabeteko haur bat ere hil zen indarkeria matxistaren ondorioz: gizonezko batek leihotik bota zuelako hil zen.
Bertze eraso bat Baionan
Emaztea jotzeagatik bertze gizon bat kondenatu du Baionako Auzitegi Korrekzionalak. Joan den astean ezarri zuen salaketa emakumeak, eta hiru hilabeteko kartzela zigorra ezarri dio epaileak gizonezkoari. Espetxeratu dute.
