Eusko Jaurlaritzako Herrizaingo Sailak Bilbon antolatu duen Oroimenari eta Bizikidetzari Buruzko Biltzarrean hainbat kolektibo bazter utzi izana salatu dute. Atzo hasitako biltzarra estatuaren indarkeriak eragindako biktimen kasua da, Egiari Zor fundazioak ohartarazi zuenez. Fundazioak kritikatu du Bilboko biltzarrari «asmo politikoa» dariola, eta uste du biltzarraren «ezaugarria» ilustratzen duela biltzarraren amaierako ekitaldirako programatu den Espainiako Gobernuko Barne ministro Jorge Fernandez Diazen parte hartzeak.
Egiari Zor fundazioarentzat, «baztertzailea» da Oroimenari eta Bizikidetzari Buruzko Biltzarra, eta han irudikatuko dena «zati baten kontakizuna» izango da.
«Galdutako aukera handia»
EAJren Bizkai Buru Batzarreko lehendakari Andoni Ortuzarrek ere uste du biltzarrean ez daudela «ahots guztiak». Horregatik, Ortuzarren hitzetan, atzo hasitako biltzarra «galdutako aukera handia» da. Jaurlaritzak biltzarraren berri lehen aldiz eman zienean «gauza ireki bat» egiteko asmoa zuela adierazi du Ortuzarrek, «baina hasierako planteamendutik oraingora oso alde handia dago». «Memoriaz eta bizikidetzaz mintzo bagara, ahots guztiek egon behar dute», azpimarratu zuen BBBko lehendakariak.
EAko idazkari nagusi Pello Urizar ere kritiko mintzatu zen biltzar horri buruz. Herri Irratian egin zioten elkarrizketan, Urizarrek esan zuen «beldurra» eragiten diotela «askatasunari buruz» mintzatzearekin batera «betoa erabiltzen dutenek».
Biktima batzuk bazter utzi dituztela salatu dute
Egiari Zor fundazioak kritikatu du Bilboko biltzarrari «asmo politikoa» dariola
Iruzkinak
Ez dago iruzkinik
Ordenatu
