Bilbaok dio 2011n "EAJ eta PSE-PPren artean hautatu" beharko dela, "ez da beste aukerarik izango"

Jose Luis Bilbao Bizkaiko ahaldun nagusi eta EAJko kideak dio hurrengo urteko udal eta foru hauteskundeak "oso garrantzitsuak" izango direla, "[EAEn] EAJ eta PSE-PPren artean hautatu beharko delako; ez da beste aukerarik izango". Herritarren "aukera abertzalea EAJ" izango dela adierazi du Bilbaok Radio Euskadin.

Patxi Lopez Eusko Jaurlaritzako lehendakari eta PSE-EEko idazkari nagusiak asteburuan iragarri du 2011ko bozetan euren helburua Eusko Legebiltzarrean PPrekin daukaten akordioa udaletara eta aldundietara "zabaltzea" izango dela. Bilbaok uste du, ordea, Lopezek ez daukala proiekturik. "Beti orrialde zuri batekin azaltzen da, ez du proposamenik".

Halaber, Joseba Egibar EAJko Gipuzkoako presidendeak iritzi dio PSEk eta PPk 2011n ere bat egingo dutela; "bestela, Jaurlaritza erori egingo da".

Araban, Bizkaian eta Gipuzkoan EAJko kideak dira ahaldun nagusiak: Xabier Agirre, Bilbao bera eta Markel Olano, hurrenez hurren. Gasteizko eta Donostiako alkateak PSEkoak dira (Patxi Lazkoz eta Odon Elorza) eta Bilbokoa jeltzalea (Iñaki Azkuna). Nafarroako Gobernuko lehendakaria eta Iruñeko alkatea UPNkoak dira: Miguel Sanz eta Yolanda Barcina.

Bilbaok ez du argitu 2011n EAJren Bizkaiko hautagaia bera izango den. "Ez naiz ni hori erabaki behar duena. Alderdiak ez du oraindik hasi prozesua".

Aralarren kritika EAJri

Aralarrek Bizkaiko EAJren "nagusikeria" kritikatu du, eta gogoratu dio esparru abertzalearen baitan badaudela "beste alternatiba batzuk PSE-PP fronteari aurre egiteko".