Emakume gazte baten gorpua topatu zuten larunbat eguerdian Bilbon, itsasadarrean, Zorrotzaurre inguruan. 21 urteko neska batena zen, Santanderkoa (Kantabria, Espainia).
Ertzaintzak BERRIAri jakinarazi dionez, gorpuak ez du indarkeria zantzurik, baina auzitegi medikuaren txostena falta da oraindik emakumeak indarkeriarik jasan ote zuen baieztatzeko. Ertzaintzak ez du hipotesirik baztertzen.
Eguerdian, 12:05ean jaso zuten abisua. Bilboko udaltzainak joan ziren lehenik, baina, emakumea hilda zegoela ikusita, Ertzaintzak hartu zuen ikerketa bere gain. Itsasadarrean zegoen gorpua, ur gainean, eta Bilboko suhiltzaileek atera zuten handik. Epaileak agindu zuenean, auzitegi medikuntzako institutura eraman zuten hilotza, autopsia egitera. Nola hil zen argitu nahi dute horrekin.
