Bilboko itsasadarrean ez bainatzeko aholkua eman du udalak, ura aztertu ostean. Ez dute aurkitu ekainean hiru kirolariri eragin zien leptospira bakterioaren aztarnarik, baina bai beste batzuena, esaterako, estreptokokoenak. Hala ere, Juan Mari Aburto alkateak nabarmendu duenez, horrek ez du esan nahi "bilbotarrek uraz gozatu ezin dutenik".
Alkateak ez du baztertu aurrerago itsasadarrean kirol proba gehiago egiteko aukera, nahiz eta aitortu ingurua ez dela egokia bainatzeko. "Guk ez dugu bainua debekatuko, baina ez da inguru egokia. Bakterioak bost kirolariri eragin die, baina 1.200k hartu zuten parte proban, eta triatloia urte askoan egin izan da".
Aburtok zehaztu du aurrerantzean ere probak egiten jarraituko dutela, baina horiek Uren Kontsortzioak egin beharko lituzkeela. Bitartean, bainuaren arriskuez ohartaraziko duten kartelak jarriko ditzte inguruetan, eta baita dutxak ere, bainua hartzea erabakitzen dutenentzat.
