Bilboko Kafe Antzokian izango da gaur BERRIAren 5. urteurrena ospatzeko ekitaldia

Apirilaren 15ean abiatu ziren BERRIAren 5. urteurrena ospatzeko ekitaldiak, Andoainen, eta gaur Bilbon izango da, Kafe Antzokian, 20:00etatik aurrera. BERRIAk bost urte bete dituela, urteotako bideoa botako dute, eta aurrera begirako proiektuez hitzaldia emango du Euskarazko Komunikazio Taldeko (EKT) ordezkari batek. Ondoren, mokadua egongo da.

Ekitaldi amaieran urteurrenerako etiketatutako sagardo botila bat, BERRIAren pin bat eta BERRIAren harpidetza bi hilabetez doan jasotzeko txartel bat (ekitaldira joan dena harpideduna bada, beste bati oparitzeko) jasoko dute joaten direnak.

Espainiako Auzitegi Nazionalak 2003ko otsailaren 20an Euskaldunon Egunkaria itxi eta gero, ekainaren 21ean sortu zen BERRIA, eta bere sortze prozesuan oso garrantzitsua izan zen herriz herri egindako lana. Horregatik erabaki du EKTk 5. urteurrenaren harira eskualdez eskualde ekitaldiak egitea. "Ekitaldi horiek helburu bikoitza dute: orain bost urte jaso genuen laguntzarekin zer egin dugun azaldu eta aurrera begirako proiektuak aurkeztea", dio EKTk.

Andoaingoaren atzetik etorri ziren Gernika-Lumo, Donibane Garazi, Donostia, Altsasu, Ondarroa eta Eibarko ekitaldiak. Bilbokoaren ondoren izango dira Bera, Irun, Durango, Tolosa, Gasteiz, Arrasate, Iruñea, Baiona, Laudio, Zarautz, Getxo, Beasain, Lizarra eta Errenteriakoak. Ekainaren 21ean, bosgarren urteurrenaren egunean, ekitaldi nazionala egingo da Donostian, Kursaalean.