Goizean goiz hasi da Ertzaintza Bilboko Dendarikaleko gaztetxea husten. Hainbat lagun bildu dira eraikinaren kanpoaldean operazioa salatzeko. Lekukoen arabera, segurtasun indarrak oldartu egin zaizkie elkartasuna agertzera joandakoei, eta pertsona bat atxilotu eta beste hiru atzeman dituzte.
Gutxienez zortzi lagun zeuden eraikinaren barruan Ertzaintza heldu denean, haietako lau hirugarren solairuko balkoiari kateatuta. Horiek askatzeko suhiltzaileen laguntza behar izan dute segurtasun indarrek. Kanpoan bildutakoek txaloka hartu dituzte kanporatutakoak.
Gertatutakoa gaitzetsi eta kanporatutakoei elkartasuna adierazteko elkarretaratzea deitu dute arratsaldeko 18:00ean.
