Miren Aranguren Bilgune Feministako kideak Euskalerria Irratian esan duenez, hiru dira guztira sanferminetan bortxatuak izan diren emakumeak. Arangurenek azaldu du, 16 eta 22 urteko bi emakumeez gain, 40 urte inguruko emakume bat ere bortxatu dutela jakin ahal izan dutela.
Bilgune Feministako ordezkariak salatu du Iruñeako Udaletxea sexu erasoen aurrean "informazioa ezkutatzen" ari dela, "udaltzaingo eta epaitegietara joan gara datu gehiago izateko eta oso informazio gutxi eman digute".
Atzo bertan elkarretaratzea egin zuten Iruñean eraso sexistak salatzeko Gora Iruñeak. Iruñeko Peñek eta Andrea elkarteak bat egin zuten protesta ekitaldiarekin, eta ehunka lagun bildu ziren Eraso sexistarik ez! lelopean.
Iruñeako Udaletxeak ez du oraindik atzo izandako gertaeren inguruan adierazpenik egin.
