Bizikidetasunaren inguruko eztabaida eskatu du Elkarri-k

Nafarroako eta Gasteizko parlamentuen arteko lan taldea osatzea proposatu zuen atzo Elkarri mugimenduak. Egitasmoaren helburua alderdi guztiak bilduko dituen elkarrizketa mahaia lortzea da.

Nafarroako Parlamentuko Bizikidetza eta Nazioarteko Elkartasunerako batzordean izan ziren Elkarri-ko ordezkariak atzo. Nafarroan «bizikidetasunaren inguruko eztabaida irekitzeko» eskatu zien alderdiei Jonan Fernandez Elkarri-ko koordinatzaileak. Horretarako, alderdi guztiak tokia duten elkarrizketa mahaia eratzea proposatu zien. Aipaturiko mahaiak «bizikidetzan hobetzeko eta bakegintzarako akordioak» lortzen laguntzeko balio dezakeela adierazi zuen Elkarri-ko koordinatzaileak, batzordera sartu aurretik. Mahaia sustatzeko, Nafarroa eta Gasteizko parlamentuen artean lan taldea osatzea ere proposatu zuen. Batzordean Nafarroako Parlamentuan ordezkatuak dauden alderdi guztiak egon ziren. Alderdi guztiek eskertu zuten Elkarri-ren ekarpena. Proposamenaren inguruan «zalantza» agertu zuten bakarrak UPN eta PSN izan ziren. Hala ere, aztertuko dutela hitz eman zuten. Beste taldeek «begi onez» ikusten zuten ekarpena.Proposamena 2003ko urrian Elkarri-k hasitako bake konferentziaren segida da. Elkarri-k 122.513 sinadura bildu zituen, urriaren 20an hasi eta martxoaren 31n bukatu zuen kanpainan. Bizikidetasun esparrua adosteko alderdi politiko guztiak bilduko dituen elkarrizketa mahaia eratzeko proposamena bultzatzeko eskatzen zieten Nafarroako eta EAEko legebiltzarrei sinatzaileek.