Bizkaiko Foru Aldundiak eta Bizkaibuseko sindikatuek —ELA, LAB, CCOO, UGT eta LSB— joan den ostegunean sinatutako hitzarmena berretsi dute. Akordio horren bidez, sindikatuek bertan behera utzi zuten mugagabeko greba; horrek, ordea, langileen oniritzia behar zuen, eta hala izan du. Sindikatuek egindako hainbat batzarretan proposamena babestu dute beharginek.
Eguerdian sinatu dute akordioa, Bizkaiko Foru Aldundiko Garraio Zuzendaritza Nagusiaren egoitzan. Idatzian ageri denez, Bizkaiko Aldundiari dagokio Bizkaibuseko lineen diseinua eta garraio politika, eta hark lanpostuei eusteko konpromisoa hartu du agirian.
Zerbitzua hobetzeko asmoz, bilerak egingo dituzte bi aldeek azaroaren 7tik aurrera. Egun horretan, sindikatuek haien proposamenak egingo dituzte, eta hilaren 28an diputazioaren txanda izango da.
Akordioa sinatu aurretik, zerbitzua kudeatuko duten enpresek ituna izenpetu dute sindikatuekin; horretan, lantaldearen subrogatzea euren gain hartzeko eta aldi baterako langileak kontratatzean antzinatasuna kontuan hartzeko konpromisoa hartu dute.
