Rodolfo Ares Eusko Jaurlaritzako Herrizaingo sailburuak esan du bizkartzainen zerbitzua "moldatu eta egokitzen" ari direla. Neurriek Jaurlaritzako sailburu eta sailburuordeei eragingo diete. Bizkartzain zerbitzua murriztearen ondorioak enpresei eta langileen ordezkariei dagokien gaia dela adierazi du Aresek, ETBn. ETAk urriaren 20an jakinarazi zuen borroka armatua betiko utzi duela.
Herrizaingo sailburuak berretsi du espetxe politika "dinamiko eta malgua" bultzatuko dutela, betiere banakako neurrietan oinarrituta. Amnistia Espainiako legeditik kanpo dagoela adierazi du eta ezker abertzaleak "jarrera errealista" hartu behar lukeela, amnistiaz hitz egitea "presoak engainatzea" delako.
Hilaren 24an Jorge Fernandez Diaz Espainiako Gobernuko Barne ministroa eta biak bilduko dira, eta otsailean Mariano Raxoi Espainiako presidentea eta Patxi Lopez Jaurlaritzako lehendakaria. Aresek esan du kartzela politikaz ariko direla, besteak beste.
Bizkartzainek elkarretaratzea egin dute
Ehun bat bizkartzain Eusko Jaurlaritzaren aurrean bildu dira zerbituz honetan aurreikusita dauden murrizketak salatzeko. Hilabete honetan mila lanpostu inguru galduko dira. Bizkartzainek langileekin akordiorik lortu aurretik enplegua berregituratzeko planik ez sinatzea eskatu diote Jaurlaritzari.
