Bost euskal herritarren aurkako epaiketa abiatu dute gaur eguerdian Parisko Auzitegian: Iñaki Reta, Xabier Goienetxea, Terexa Lekunberri, Jeff Mateo eta Graxi Etxebehere dira akusatuak. 2015eko uztailean atxilotu zituen Frantziako Poliziak, Ortzaizen (Nafarroa Beherea), ETAren "aparatu logistiko-militarraren" aurkako operazio batean. Iñaki Reta Gurekin taldeak, ordea, gogorarazi du "ETAren zuloak ixteko helburua" betetzen ari zela. Gaurtik asteazkenera bitartean egingo dituzte auzi saioak.
Herritar multzo bat Parisen da auzipetuei babesa emateko; horien artean, EH Baiko zuzendaritzako kide Xabi Larralde. "Denok dakigu nola eraman den [ETAren] armagabetze hori, eta baita ere nola euskal jendartearen mobilizazioa eta hainbat herritarren parte hartzea beharrezkoa izan den”, esan du Larraldek. Auzipetuak libre uzteko eskatu du EH Baikoak, "bere garaian ekarpen ezinbestekoa egin diotelako euskal konponbide prozesuari".
[BIDEOA]
— EH Bai (@EHBai) 2018(e)ko abenduaren 17(a)
🎥 EHBAIko zuzendaritzako kidea den @xabi_larralde Parisen da, gaur Pariseko auzitegi korrekzionalera deituak izan diren 5 Euskal Herritarrak sustengatzeko. pic.twitter.com/mCgaDBo1xo
Retak eta Goienetxeak preso jarraitzen dute, eta biak daude Fresnesko kartzelan, Euskal Herritik 930 kilometrora; Lekunberri eta Mateo ziren aurreneko biak atxilotu zituzten etxeko jabeak, eta, horiek ere atxilo eraman bazituzten ere, aske utzi zituzten ondoren. Etxebehere ere libre geratu zen, Parisen epailearen aurrean deklaratu eta gero. ETAk armagabetzeko borondatea adierazia zien ordurako nazioarteko eragileei.
Operazioaren ondoren, 2.000 lagun inguruk salatu zituzten atxiloketak, Donibane Garazin.
