Miarritzen L'Ateliar, L'Impertinent eta Chateau de Brindos saritu dituzte; Hendaian Eguiazabal etxea eta Donibane Lohizunen Zoko Moko.
"Xanpain botila ireki dugu albistea jasotzean". Sarah eta Fabian Feldmann senar-emaztea Miarritzeko L’Impertinent jatetxearen gidaritza daramate. Senarra sukaldaria da, Sarah berriz, jangelako arduraduna. "Hornitzaile baten bidez jakin ahal izan dugu", dio Sarah Feldmannek. Kontent dago oso bikotea, orain hamar hilabete besterik ez baita jatetxea ireki zutela. Hala ere, Michelin gidako saria ez zaie guztiz arrotza egin. Alemanian, Fabian Feldmanen aberrian, zazpi urtez eduki zuten jatetxe bat, eta hark ere jaso zuen gida gorriaren kritikoen aitortza.
Chateau de Brindes Miarritzeko jatetxe eta hoteleko langileek ere pozarren jaso dute albistea. "Helburu hori lortzeko urteak daramatzagu lanean", azaldu du Arnaud Arnaud Sehebiade hoteleko zuzendariak. "Bost izarretako hotela, eta aldi berean Michelin izar bateko jatetxea duen bakarrenetarikoak gara".
Oro har Euskal Herrian lau jatetxek dituzte hiru izar: Eneko Atxaren Azurmendi jatetxeak, Pedro Subijanaren Akelarrek, eta Juan Mari Arzak eta Martin Berasategiren jatetxeek.
