Burlatako etxebizitza batetik egotzi behar zituzten gaur bikote bat eta haien hiru seme-alaba adingabeak, baina bertan behera geratu da prozedura. Kaltetuek hiru idatzi aurkeztu dituzte Iruñeko Auzitegiko 2. aretoan, Hipotekak Kaltetutakoen Nafarroako Plataformako kideek lagunduta, eta elkarrizketa bat eskatu diote epaileari. Kaleratzearen aurkako argudioak azaltzea eta, desjabetzea egitekotan, eguna eta ordua zehaztea nahi izan dute kaltetuek.
Goizeko bederatzietarako, 300 bat pertsona elkartu dira etxebizitzaren atarian, kaleratzearen aurka protesta egiteko. Azkenean, prozedura bertan behera utzi dute.