Gaur goizean bukatu dute deklaratzen lekukoek Nicolas Bonnemaison Baionako ospitale publikoko mediku ohiaren aurkako epaiketan. Eta epaiketan aurkeztutako aldeak goizean hasi dira ondorioak aurkezten. Medikuaren aurka parte zibil gisa aurkeztutako familiak ez du haren kontrako eskaririk egin. Prokuradoreak, baina, Bonnemaisonen aurkako zigor eskaerari eutsi dio, hobendun dela iritzita.
Epaiketan zehar medikuari buruzko irudia aldatu zaiola onartu du prokuradoreak. Baina nabarmendu du medikuak hil egin zituela eriak, ez sedatu. Eta legez kanpo aritu zela, Leonetti legeak zehaztutakoez aparte. "Eta hiltzea zigortu egiten du zigor kodeak". Horregatik, akusatua zigortzeko eskatu du prokuradoreak. Bost urteko espetxe zigorra ezartzea galdegin du, baina baldintzapean izango litzateke, eta beharbada ez luke espetxera joan beharrik izango ere.
Epaiketa hastean bizi osorako espetxe zigorra arriskatzen zuen Bonnemaisonek. Defentsako abokatuak ere prokuradoreari esan dio ez dela koherentea defenditzea medikuak zazpi lagun hil zituela, eta zigorra bost urtekoa soilik izatea.
Ekainaren 11n hasi ziren Paueko Krimen Auzitegian epaitzen Bonnemaison. Zazpi eri pozoitzeaz akusatzen dute, eta bizi osorako presondegi zigorra eskatua dute harentzat. Mediku ohiak ez ditu akusazioak ukatu. Auzia beste bat da: legea bete ote zuen edo ez, eta legea betetzea posible ote den.
Izan ere erien eta hilzorian diren pertsonen eskubideak arautzen dituen Leonetti legea dago eztabaidaren muinean. Legeak dio medikuek lagundu ditzaketela hilzorian diren pertsonak, sedatuz eta sufrimendua saihesten lagunduz. Baina, horretarako, erien senideekin eta gainerako medikuen hitz egin behar dute aurrez.
Familiei eta lankideei ez zien ezer esan Bonnemaisonek, epaiketaren lehen egunean bertan onartu zuen. Baina zehaztu zuen haientzat "kulpa iturri" izango zela halako erabaki bat hartzea, eta erruduntasuna eta zama hori saihesteko ez ziela ezer esan. Ez zuzenean, baina zeharka adierazi zuen, beraz, Leonetti legeak ez dituela osasun arloko profesionalak guztiz asetzen.
Jean Leonetti legearen egile eta UMPko diputatua ere izan da epaiketan, deklaratzen. Joan den astean izan zen, eta legea egoki dela defenditu zuen: "Ez zait iruditzen Bonnemaison hiltzaile bat denik, baina, testuinguru jakin batean, legea urratu zuen".
Ekainaren 11tik hona dozenaka pertsona pasatu dira Paueko Krimen Auzitegitik: medikuak, erizainak, laguntzaileak, politikariak, soziologoak, Belgikako medikuak —han legeztaturik da eutanasia—, hildakoen senideak, psikiatrak... Ikusmin handia eragin du auziak, François Hollande Frantziako presidenteak hauteskundeetarako iragarria baitzuen hilzorian diren pertsonentzako lege berri bat. Bonnemaisonen aurkako auzia eztabaida horren erdian heldu da beraz.
Legea eztabaidagai
Eta auzitegian jasotako deklarazio asko ere bide horretatik joan dira. Mediku ugarik salatu dute Leonetti legeak ez dituela jasotzen eta arautzen erietxeetan gerta litezkeen kontu guztiak. Izan dira, baita ere, Leonetti legea defenditu dutenak. Michel Andre medikuak zorrotz esan zuen, profesional gutxik ezagutzen eta betetzen dutela Leonetti legea.
Bonnemaisonek sedaturik hil ziren senideen artean, berriz, familia bakarra aurkeztu da parte zibil modura. Bere garaian jaso ez zituzten azalpenak jasotzeko aurkeztu direla zehaztu dute, eta azalpenak eskatu medikuari. Ezer ez esatea beharbada ez zela aukera onena izan aitortu zien mediku ohiak senide horiei. Beste senide batzuek, aldiz, esker onez hitz egin diote Bonnemaisoni.
Epaiketa luzea eta eztabaida handia izan dira. Gaur, 14:00etatik aurrera, akusazioek eta defentsak beren azken argudioak eta eskakizunak aurkeztuko dituzte. Auzitegiko langileek espero dute gaur bukatzea, eta bihar Bonnemaison berari emango diote azken hitza hartzeko aukera. Epaia, berriz, bihar bertan edo etzi har dezaketela esan dute auzitegiko iturriek.
