Aho batez onartu dute Wenceslao Olea eta Maria Victoria Cinto CGPJ Botere Judizialaren Kontseilu Nagusiko kideek egin duten txostena. Txosten horren arabera, Espainiako Konstituzioaren aurkakoak dira Herritarren Segurtasunerako Legearen hainbat puntu. Adibidez, Poliziaren aurrean identifikatzen ez diren pertsonak atxikitzea —Konstituzioaren 17. artikuluaren aurkakoa litzateke—. Txostenak jasotzen duenez, lege berrian jaso beharko litzateke poliziek "betebeharra" dutela informatzeko zergatik ari diren herritar bat identifikatzen.
Leku publikoetan kontrolak jartzeko aukera ere Espainiako Konstituzioaren aurkakoa da Botere Judizialaren Kontseilu Nagusiaren arabera. Era berean, txostenak dio salbuespen egoeretan herritarrei pasaportea ukatzea legez "zalantzazkoa" dela.
Enpresa pribatuetako zaintzaileek segurtasun indarrekin manifestazioak sakabanatzen "lagundu" behar dutela jasotzen du Barne Ministerioaren aurreproiektuak. Hori ere kritikatu du txostenak.
Botere Judizialaren Kontseilu Nagusiak, era berean, baztertu egin du administrazioak jartzea isunak, epaile batek jarri beharrean. Espainiaren eta bere sinboloen ofentsa egiteagatik lege berriak ezarri nahi dituen isunen inguruan, txostenak esaten du lehendik ere halakoak delitutzat jotzen direla.
