BURTSA. Urrirako kontsulta

Joan da iraila, eta burtsan zer gertatzen denari buruzko kontsulta, urrirako gelditu zaigu. Ea urriak zer argitzen duen. Hiruhilekoan, gorabeherak gaindituz galera txikiak izan dituzte gure indize nagusiek (%1,6 ingurukoak baino ez), baina sektorekako portaera nabarmen ezberdina izan da. Higiezinen eta bankuen sektoreak pairatu ditu finantza krisiaren lehen ondorioak; Edurnezuriren (+%0,36) sasoiarengatik izan ez balitz, oso bestelakoa zatekeen hiruhileko honetako emaitza. Ikuskizun dago aurrerago noraino hel daitezkeen maileguaren garestitzearen ondorioak. Atzoko eguna lau-lau itxi zuten gure indizeek, 3.775 milioiren salerosketarekin. Mapfre (+%4,62) nabarmendu zen goitik eta %1,6na galdu zuten Antena 3 eta Telecinco telebistak behetik. Petrolioa eta euroa egoskor bezain indartsu dabiltza. Garesti biak ere. Egoera honetan, hiru hitzeko mezua bururatzen zaio hainbati, lehor bezain zuhur: tentuz, tentuz, tentuz.

BBVA. Manuel Jove enpresari galiziarrak BBVAren (-%0,24) %5 du bere esku. Aurten 20 eurotik gora ibili den akzioa, 16,44 euroan finkatu zen atzo. Maximoak urrun dira, %25 gorago. Bilboko bankuaren sorreraren 150.urteurrena ospatzen da aurten, batik bat Madrilen.



M&A. Bat-egite eta erosketen jarduerak, M&A delakoak, %42ko jaitsiera izan du hiruhileko honetan. 2,7 bilioi euroren eragiketak eman dira aurten, inoizko gehien, baina azken hiru hilabeteetan eragiketak gutxitu eta gelditu egin dira. Marea biziak legez, itzuliko da.