Argia da Fedeafes buruko erien elkarteen federazioak abiatutako ikerketaren ondorioa: buruko osasun arazoren bat duten emakumeenganako indarkeria kasu gehienak ez dira hautematen, eta, antzematen den kasuetan, "emakumeek ez dute erantzun egokirik jasotzen, zerbitzu publikoak ez baitaude haien beharretara egokituta".
Kezkagarriak dira esku artean dituzten datuak: buruko nahasmendu larria duten lau emakumetik hiruk indarkeria jasan dute noizbait familiartean edo bikote harremanean; noizbait bikote harremana izan eta buruko gaixotasun larria duten emakumeen %80 inguruk jasan dute bikotekideak eragindako bortxakeria. Familiarekin bizi diren emakumeen %52 indarkeriaren biktima izan dira. Eta biktma izan arren, ez dakite: %40k baino gehiagok ez dute uste biktima direnik, eta, are gehiago, "errudun" direla ere sentitzen dute.
Egoera aldatzeko eskaera zehatzak egin ditu elkarteak, gaur, datuen berri ematearekin batera. "Instituzioen arteko koordinazio eta deribazio protokoloak" eskatu ditu, esaterako; baita Osakidetza barruan ESI erakunde sanitario integratu guztietan gaia txertatzeko ere; "espezializatutako zerbitzuak" prestatzea, arreta psikiatrikoa ematea, eta beste hainbat eskaera.
