Nafarroako Parlamentuko Mahaiak eta Bozeramaileen Batzordeak gaur erabaki dute Yolanda Barcina Nafarroako Gobernuko presidenteak azalpenak ematea CAN auziaren inguruan.
Maria Paz Benito Iruñeko 3. istrukzio auzitegiko epaileak adierazi zuen "ezinbestekoa" zela Barcinak inputatu gisa deklaratzea Nafarroako Kutxako Erakunde Sortzaileen Batzorde Iraunkorreko bileretan jasotzen dituzten dieten inguruan, eta horren ondotik erregistratu zuen Bilduk eskaera bat parlamentuan, Barcinak bertan eman ditzan auziari buruzko azalpenak.
Bilduk eskatu du Barcinak azaltzeko zein egoeratan gelditzen diren erkidegoa eta erakundeak "Nafarroako Kutxan gertatutako gehiegikerien ondoren". Parlamentuko Mahaiak eta Bozeramaileen Batzordeak goizeko hamarretan hasi dute bilera, eta bertan ebatzi dute Barcinak agerraldia egitea.
Koalizioak mahaiari eskatu dio aste honetan bertan izan dadin agerraldia, eta "saiatzeko konpromisoa" adierazi du mahaiko presidenteak.
