Colette Capdevielle eta Jean Lassalle PS eta Modem alderdietako diputatuek atxikimendua adierazi diote larunbatean Bilbon (17:30, Casilla) euskal presoen eskubideen alde egingo den mobilizazioari, Herrira-k iragarri duenez.
Baionan iazko azaroaren 10ean euskal presoen eskubideen alde egindako manfestazioari ere sostengua agertu zioten Capdevielle eta Lassallek. Hain zuzen, Ipar Euskal Herriko sei parlamentarioetatik lauk eman zuten atxikimendua: bi haiez gain, Frederique Espagnac eta Sylviane Alaux PSko kideek.
Martxa hura ere Herrira-k deitu zuen. Hamabost mila lagun bildu ziren Baionako karriketan. Kolore orotako alderdi, sindikatu eta eragileak batu ziren.
