Carlos Iturgaitzi zigor espedientea ireki diote, eta hark "barkamena" eskatu du

"Nahiago izan dugu bai Iturgaitz jaunari berari ere behar delako eskubideak irekitzea eta luzatzea, bere defentsan esan nahi duena esan dezan. Dena dela ere, benetan negargarrizko ekintza izan zen, hor dago bai irudietan eta baita gure ordenagailuetako datuetan ere", zehaztu du Atutxak.

Orain minutu gutxi Carlos Iturgaitz berak "barkamena" eskatu du eta onartu egin du "nahigabe, jolasean ari zela Jaime mayor Orejaren botoia sakatu zuela". Bere esanetan, gaiak ez luke haratago joan behar, garrantziari gabeko gertakizuna besterik ez zelako izan.

Telebista irudiak froga bezala

Eusko Legebiltzarreko osoko bilkuran, joan den ostegunean, bere botoaz gain batzarretik falta zen Jaime Mayor Oreja alderdikidearena eman zuen Carlos Iturgaitz PPko legebiltzarkideak. Telebista irudiek argi eta garbi utzi zuten bere eserlekuko botoa emateko botoiaz gain, albokoarena —Mayor Orejarena— sakatzen zuela Iturgaitzek, gutxienez hiru alditan. Jokaera iruzurti hori dela eta, Iturgaitz zigort espedientea zabaltzea ebatzi du Legebiltzarreko Mahaiak.

Nolanahi ere, Legebiltzarreko Mahiak ez du erraza izango horri buruz erabakitzea. Izan ere, Eusko Legebiltzarreko araudiak ez du horrelako kasuei buruzko aipamenik egiten, eta, gainera, beste inoiz ez da halakorik gertatu. Legebiltzarreko zerbitzu juridikoek gaia aztertzen jardun dute egunotan.