AHT abiadura handiko trenaren lanek aurrera jarraitzen dute Nafarroan, eta Gobernu Kontseiluak Castejon-Alesbes zatiko lanak eman dizkio Acciona Infraestructuras eta Obenasa enpresek osatutako taldeari. 28,46 milioi eurotan eman dituzte obrak, eta hori lorpen gisa aurkeztu du Iruñeko gobernuak, lehiaketan aurreikusitakoa baino %30 gutxiagoan eman baitituzte obrak. Sei kilometro pasatxo ditu zatiak. Udan hasiko dira obrak. Inguruko bigarren zatia izango da lanean; aurreko azaroan hasi ziren Cadreita eta Alesbes artean.
Murrizketa garaian AHTak sortuko duen gastua gutxietsi egin du Luis Zarraluki Sustapen kontseilari berriak. Azaldu du Espainiako Gobernuak ordainduko duela azpiegitura: "Nafarroaren gastuan eta zorpetzean ez du eraginik izango". Hori bai, aitortu du Nafarroan interesak pagatu beharko dituela.
AHTaren defentsa sutsua egin du kontseilariak: "AHTak Nafarroari aukerak eta onurak ekarriko dizkio, eta jada ari da ekartzen. Europako trenbide sarean jarriko baikaitu, industria jarduna erakartzeko bidea izango baita, eta zerbitzuetan eta enpleguan eragina izango baitu".
