GALek 1983 eta 1987 bitartean egindako atentatuetako batean zauritu zen gizon bat hil da: Christian Casteigts, 49 urterekin. 1985eko otsailaren 5ean haren auto azpian jarritako bonba bat lehertu zuen GALek, eta Casteigts larri zauritu zen: zango bat galdu zuen, eta ordutik paraplegia izan zuen. 22 urte zituen orduan.
Larunbatean zendu zen. Askatasuna erakundeak jakinarazi duenez, haren aldeko ehorzketa astelehenean egin zuten Bardozen, eta gorpua atzo erraustu zuten Miarritzen.
"Gure doluminak helarazten dizkiogu familiari, eta, beste behin ere, martxan den prozesuak egia osoa argitara eman beharko duela azpimarratzen dugu", esan du Askatasunak. "Gatazka politikoaren baitan izan diren bortizkeria guztien inguruko egia jakin nahi dugu, eta, besteak beste, frantses agintariek talde paramilitarren ekimenetan izan zuten parte hartzea zer heinetakoa zen".
