Kantonamenduen mapa berriari buruz, Euskal Herriaren ezagupen instituzionalaz eta indar metaketaz mintzatu da, besteak beste, Daniel Olzomendi, Udalbiltzako lehendakariorde eta EH Baiko kidea, bihar BERRIAk argitaratuko duen elkarrizketan. Hona hemen esan batzuk:
Egoera politikoa: “Euskal Herriak berriz ere kolpe bat hartu du; denbora laburrez biziki gauza bildu ditugu buru gainera: ikastola, hizkuntza, bake prozesua... Ongi kokatutzat genituen hainbat gai zalantzan dira! Momentu txar batean gara, eta ez dakit nora goazen”.
Kantonamenduen mapa berria: “Badakigu Euskal Herriaren kontra doan hautu politiko azkar bat dela, eta badakigu estatua zer egiteko gai den. Baina Euskal Herria ez da isilik egonen; dinamika bat izanen da, ez da dudarik”.
Euskal Herriaren ezagupen instituzionala: “Abertzaleok badu aspaldi diogula ez dugula gauza handirik lortuko Paristik; beraz, behar dugu ikusi nola antolatzen garen azkarrago izateko. Lekuko politika indartu behar dugu; ez dut beste aterabiderik atzematen”.
