Nahi dugulako / beharrezkoa dugulako, guk ere BAI independentziari leloarekin, manifestazioa egin dute gaur arratsaldean Durangon, Independentistak Sareak antolatuta. Plataformak salatu du Espainiako konstituzioak euskal gizartearen eskubideak ukatzen dituela: "Oso argi dugu independentzia Euskal Herriarentzat aukera onena dela, independentziarekin dena dugulako irabazteko eta gutxi galtzeko".
17:00etan ekin diote manifestaldiari, eta ehunka lagun batu dira Durangoko kaleetan. Agiri bat irakurri dute ibilbide amaieran: "Kataluniak eta Eskoziak egin badute, egingo dugu guk ere". Halaber, independentzia aldarrikatu dute "demokrazia eraikitzeko".
Manifestazioaz gain, egun osorako egitaraua prestatu du plataformak. 12:00etan, Eskozia, independentziara bidaia XXI.mendeko Europan liburua aurkeztu dute, esaterako.
