Diru sarrerak bermatzeko errentak "porrot" egin duela uste du Javier de Andres Arabako PPko presidenteak. Horri aurre egiteko laguntza hori jasotzen dutenen "gizarteratzeko nahia" neurtu behar dela gaineratu du, eta, horretarako, bi proposamen egin ditu: euskara edo gaztelania ezagutzea, eta "gizarte lanak" egitea.
Hizkuntzen ezagutza bermatzeko bost urteko epea iradoki du De Andresek, gaur goizean emandako prentsaurrekoan. Baldintza hori betetzen ez dutenei DSBE emanda "mezu okerra" zabalduko litzatekeela gaineratu du. Hizkuntzez gain, "gizarteari egindako ekarpena" neurtzeko asmoa agertu du PPko Arabako buruak.
PPk prozesu bat hasiko du "DSBEk egiten dituen akatsak aitortzeko". Eusko Jaurlaritzako Enplegu eta Gizarte Politiketako Sailari zenbait galdera bidaliko dizkio datozen asteetan, "akats" horiek ezagutzeko asmoarekin.
