Urriaren 15ean atxilotu zituzten, sanferminetako txupinazoaren unean ikurrina handi bat zintzilikatzea eta, ekintza horrekin, desordena publikoak eragitea egotzita. Iruñeko 2. Instrukzio Auzitegiko epailearen aurrean deklaratu ostean, libre geratu ziren. Epaitegian hilean behin aurkezteko agindu zien epaileak.
Hitzordua zuten gaur epaitegian, DNA laginak utz zitzaten. Ikurrina eskegi zutenak inputatuta daudenak izan al ziren baieztatu nahi du horrela epaileak. Froga horiek egiteari uko egin zioten auzipetuek polizia-etxean, eta beste horrenbeste egin dute gaur.
Inputatuen izenean, Arantxa Izurdiaga abokatuak azaldu du eginbide "erraza" zela gaurkoa, eta epailea ez zegoela bertan. Hortaz, haien ukoak ez du erantzun judizialik izan. "Epaileak neurriren bat hartu zain" geratu da abokatua.
Espainiako Auzitegi Goreneko magistratu Jose Antonio Martin Pallinek esan zuen "neurriz kanpokoa" zela horrelako auzi batean DNA laginak eskatzea, eta Izurdiagak azaldu du hori izango dela defentsak baliatuko duen argudioetako bat.
