«Erokeria gelditu! Metroaren obrak orain Kontxaren azpian» leloaren bidez, Donostiako metroaren lanak erabat gelditzeko eskatu dute gaur eguerdian Donostian, Satorralaia plataformak deituta. Kontxako hondartzara eraman dute protesta, igande eta uda giro betean.
«Kontxa eta Donostia zulatu, zertarako?», mezua zabaldu dute hondarretan jarritako pankarten bidez, eta pasealekuko erlojuetan eginiko bilkuran. Ramon Agirre aktoreak parte hartu du protestan, eta egitasmoaren inguruko antzezlan parodiko bat egin du, metroko lanen zuzendariarena eginda.
