Josu Uribetxeberria euskal presoa Donostiako Ospitalera eraman dute, Espetxeetako Zuzendaritzak baimenduta. Gaixotasun larriak dituzten 14 presoetako bat da Uribetxeberria. Berriki jakinarazi dute minbizia berritu zaiola eta bi nodulu berri eta metastasia dituela.
Leongo ospitalean (Espainia) izan dute arrasatearra azken hamabost egunetan. Presoaren anaiak kontatu duenez, buruko min handiekin ibili zen Uribetxeberria eta presondegiko ospitalera eraman zuten aurreko egunetan; zenbait proba egin, eta metastasia duela ondorioztatu dute. Duela zazpi urte giltzurrunean aurkitutako minbiziaz gain, beste bi nodulu atzeman dizkiote: buruan bat, eta biriketan bestea.
Hainbat gizarte eragilek eskatu dute egunotan eritasun larri eta sendaezina izanik, legez onartua dagoen baldintzapeko askatasuna. Etxerat-ek eta Martin Garitano Gipuzkoako ahaldun nagusiak egin dituzte adierazpenak gaur, Azpeitian, eta biek ala biek azpimarratu dute "egungo legedia bete" eta "aske" utzi beharra dutela Uribetxeberria. "Ez da posibe giza eskubideen alde lerratzea, baina gero biktimen artean mailaketak egitea", salatu du Etxerat-ek. 2007ko uztailean, ukatu egin zioten askatasun eskaera.
2005eko apirilean, tumore handi bat aurkitu zioten Uribetxeberriari ezkerraldeko giltzurrunean. Urte bereko maiatzean zenbait proba egin ostean, minbizia diagnostikatu eta ezkerreko giltzurruna kendu behar izan zioten. Hori dela eta, bizi osoan tratamendua jaso beharra dauka. Jaiki Hadi elkarteak dioenez, espetxean egon gabe ere, halako gaitzak berpizteko aukera %51koa izan ohi da bi urtean.
