Donostiako Udalak aho batez salatu du gaur atzo adingabeko batek jasan zuen sexu erasoa. Juan Karlos Izagirre alkatea alderdi guztietako bozeramaileekin batera agertu da, eta hamar egunetan izan den bigarren salaketa dela gogoratu ondoren, erasoa gaitzetsi du: "Udal hau ez dago hiri honetan horrelakorik jasateko prest, ezta beste inon ere", esan du Izagirrek.
Atzo jakin zen erasoaren berri, eta gaur Eusko Jaurlaritzako Herrizaingo Sailak baieztatu du. Adingabekoa Donostiako Ospitalean artatu zuten. Izagirrek elkartasuna agertu dio erasoa jasan zuen neskari eta bere senitartekoei eta Udalaren laguntza eskaini dio.
Ertzaintzak ez du erasoaren inguruan datu gehiagorik eman ikerketa ez oztopatzeko, izan ere erasotzailearen bila dabil.
Salaketa hori azken egunetan izan direnei gehitu zaie. Guztiak salatzeko biltzera deitu du gaur eta bihar, besteak beste, Bilbon, Gasteizen, Donostian, Iruñean, Tolosan, Errenterian, Zarautzen, Arrasaten, Irunen, Azpeitian, Lizarran, Altsasun, Leitzan, Portugaleten, Zornotzan eta Algortan. Emakumeen aurkako indarkeria gehiagorik ez lelopean.
Atzoko erasoa, astebukaeran Bilbon izan denari gehitu zaio. Bilbo Zaharra auzoan larunbata arratsaldean gizon bat emakume bat bortxatzen saiatu zen, eta herritar batek eragotzi zuen bortxaketa. Ertzaintzak erasotzailea atxilotu zuen.
Baionan ostiralean andre-gizon bikote bat hilotz agertu zen, eta gizonak emaztea hil eta ondoren bere buruaz beste egin zuela uste du Poliziak.
