Donostiako Udalak Gipuzkoako garraio partzuergotik kendu ditu Denis Itxaso eta Susana Garcia ordezkari sozialistak, ohar bidez jakinarazi duenez. Udalak Nora Galparsoro eta Axier Jaka Bilduko zinegotziak izendatu ditu kargurako.
San Marko mankomunitatean Bilduko ordezkari bat kanporatzearen ondotik hartu du udalak erabakia, "PSE-EEk karguak alderdi guztien artean banatzeko akordioa apurtu duelako". Egun Lurdes Azebedok (PSE-EE) ordezkatzen du Lasarte-Oriako Udala San Marko mankomunitatean. Nerea Santxezen (Bildu) kargua hartu zuen. Kentzearen alde egin zuten PSE-EEk, EAJk eta PPk.
Juan Karlos Izagirre Donostiako alkatearen esanetan, bere garaian udal gobernua oso "eskuzabala" izan zen ordezkaritzak banatzeko orduan, "baina PSE-EEk ez du akordioa errespetatu". Hala, konpromisoak mantentzeak zentzurik ez duela uste du Izagirrek.
