Komunikazioa

EAEko Auzitegi Nagusiak onartu egin du Antxeta Irratiak jarritako helegitea

Sententziak dio irrati lizentzien lehiaketa amaitu eta baimenak esleitu behar dituela Jaurlaritzak. Arrosa irrati sareak Jaurlaritzari eskatu dio ez jotzeko Espainiako Auzitegi Gorenera.

Arrosa Irrati Sareak, Antxeta Irratiak eta euskalgintzako eragileak, gaur. ANDONI CANELLADA / ARGAZKI PRESS
urtzi urkizu
2015eko martxoaren 4a
12:29
Entzun

Ez da kasu bakarra Antxeta Irratiarena. 2012. urtean, Jaurlaritzak antolatutako lizentzien lehiaketan behin-behineko adjudikazio bat izan zen. Euskarazko hainbat proiektuk eskuratu zituzten lizentziak. Baina Patxi Lopezen gobernuak agintaldiaren amaieran bertan behera utzi zuen lehiaketa, eta erabakia Jaurlaritza berriaren esku. Hainbat irratik jarri dute helegitea EAEko Auzitegi Nagusian, eta guztiak izan dira onartuak. Sententzian epaileak lehiaketa amaitzera eta lizentziak esleitzera behartzen du Jaurlaritza.

Iazko azaroan, ordea, Jaurlaritzako Hezkuntza, Hizkuntza Politika eta Kultura Sailburuaren Kabineteko zuzendari Jose Manuel Bujandak iragarri zuen Jaurlaritzak kasazio helegitea jarriko duela Espainiako Auzitegi Gorenean. Arrosa irrati sareak Jaurlaritzari eskatu dio sektorearen "behar bezalako erregularizazio bat" egiteko. "Horretarako, askoz egokiagoa eta koherenteagoa  iruditzen zaigu EAEko Auzitegi Nagusiaren erabakia onartzea, eta Espainiako Auzitegi Gorenera ez jotzea", esan du gaur Donostian Arrosako kide Jon Aranburuk.

Jaurlaritzak beste lehiaketa bat egin nahi du, baina justiziaren erabakiak direla eta ez direla, luze jo dezake horrek. Gutxienez bi urte joango dira EAEko irrati lizentzien lehiaketa berria hasi arte.

Hekimen euskak hedabideen elkarteko zuzendari Alberto Barandiaranek eta Tokikomeko lehendakari Urko Aristik babesa eman diete Antxetako eta Arrosa sareko kideei.

Iruzkinak
Ez dago iruzkinik

Ordenatu
0/500
Interesgarria izango zaizu
Nabarmenduak
Orain, aldi berria dator. Zure aldia. 2025erako 3.000 babesle berri behar ditugu iragana eta geroa orainaldian kontatzeko.